Ён зрабіў шмат, каб перамагчы перадузятасьць і непаразуменьні — вынікі шматгадовай варожай прапаганды — між грэка-каталікамі і праваслаўнымі, а таксама непрыхільнае стаўленьне рыма-каталікоў да пытаньняў Вуніі, імкнуўся стварыць атмасфэру даверу і ўзаемнай пашаны. Нарэшце, ён ня раз скарыстоўваў сваё становішча, каб быць беларускім "амбасадарам" ня толькі ў Царкве, але наагул у сьвеце, пашыраючы ўсюды весткі пра Беларусь, яе гісторыю, культуру і патрэбы. У ягонай дзейнасьці здараліся памылкі і няўдачы, часам балючыя. Дый інакш і не магло быць, хоць бы таму, што шмат дзе яму даводзілася, як ён сам казаў, "гнаць першую баразну". Ён прымаў няўдачы з пакораю, але ніколі не зьняверваўся і не адхіляўся ад назаўжды выбранага шляху. Абыякавы да асабістае славы, ён ніколі не забываўся дзякаваць за ўсё Богу, якога любіў больш за ўсё, а таксама Найсьвяцейшай Багародзіцы і сьвятому Пятру, да якога адчуваў асаблівую пабожнасьць. Калі б нехта захацеў даць кароткую характарыстыку біскупа Сіповіча, дык было б цяжка знайсьці нешта лепшае за словы сьвятога Паўла: "Ласкай Божай я ёсьць тым, кім ёсьць, і ласка Ягоная ўва мне не была дарэмнаю" (1 Кар 15:10)


ЗМЕСТ

Прадмова

Першыя крокі
Вільня
Пагром
У Вечным Горадзе
Пачатак апостальскай дзейнасьці
Лёндан
Дом Марыі
"Народы Расеі"
"Новая Друя"
У Гасподнім вінаградніку
Подых свежага ветру
Біскуп
"У дарозе… у працы!" (2 Кар 11:26, 27)
"Быць усім для ўсіх!" (Гл. 1 Кар 9:22)
Між Масквой і Варшавай
"Exegi Monumentum"
Справы Марыянскія ды іншыя
Экумэнізм па-беларуску
Цяжкая біскупская мітра
Старыя і новыя прыяцелі
Пісьменнік і вучоны
Гісторыя адной сям’і
У надзеі жыцьця вечнага

Бібліяграфія працаў Чэслава Сіповіча
Паказальнік імёнаў